^{७.६५.१}धृतराष्ट्र उवाच

^{७.६५.२}तस्मिन्प्रभग्ने सैन्याग्रे वध्यमाने किरीटिना
के नु तत्र रणे वीराः प्रत्युदीयुर्धनंजयम्

^{७.६५.३}आहोस्विच्छकटव्यूहं प्रविष्टा मोघनिश्चयाः
द्रोणमाश्रित्य तिष्ठन्तः प्राकारमकुतोभयाः

^{७.६५.४}संजय उवाच

^{७.६५.५}तथार्जुनेन संभग्ने तस्मिंस्तव बले तदा
हतवीरे हतोत्साहे पलायनकृतक्षणे

^{७.६५.६}पाकशासनिनाभीक्ष्णं वध्यमाने शरोत्तमैः
न तत्र कश्चित्संग्रामे शशाकार्जुनमीक्षितुम्

^{७.६५.७}ततस्तव सुतो राजन्दृष्ट्वा सैन्यं तथागतम्
दुःशासनो भृशं क्रुद्धो युद्धायार्जुनमभ्ययात्

^{७.६५.८}स काञ्चनविचित्रेण कवचेन समावृतः
जाम्बूनदशिरस्त्राणः शूरस्तीव्रपराक्रमः

^{७.६५.९}नागानीकेन महता ग्रसन्निव महीमिमाम्
दुःशासनो महाराज सव्यसाचिनमावृणोत्

^{७.६५.१०}ह्रादेन गजघण्टानां शङ्खानां निनदेन च
ज्याक्षेपनिनदैश्चैव विरावेण च दन्तिनाम्

^{७.६५.११}भूर्दिशश्चान्तरिक्षं च शब्देनासीत्समावृतम्
स मुहूर्तं प्रतिभयो दारुणः समपद्यत

^{७.६५.१२}तान्दृष्ट्वा पततस्तूर्णमङ्कुशैरभिचोदितान्
व्यालम्बहस्तान्संरब्धान्सपक्षानिव पर्वतान्

^{७.६५.१३}सिंहनादेन महता नरसिंहो धनंजयः
गजानीकममित्राणामभितो व्यधमच्छरैः

^{७.६५.१४}महोर्मिणमिवोद्धूतं श्वसनेन महार्णवम्
किरीटी तद्गजानीकं प्राविशन्मकरो यथा

^{७.६५.१५}काष्ठातीत इवादित्यः प्रतपन्युगसंक्षये
ददृशे दिक्षु सर्वासु पार्थः परपुरंजयः

^{७.६५.१६}खुरशब्देन चाश्वानां नेमिघोषेण तेन च
तेन चोत्क्रुष्टशब्देन ज्यानिनादेन तेन च
देवदत्तस्य घोषेण गाण्डीवनिनदेन च

^{७.६५.१७}मन्दवेगतरा नागा बभूवुस्ते विचेतसः
शरैराशीविषस्पर्शैर्निर्भिन्नाः सव्यसाचिना

^{७.६५.१८}ते गजा विशिखैस्तीक्ष्णैर्युधि गाण्डीवचोदितैः
अनेकशतसाहस्रैः सर्वाङ्गेषु समर्पिताः

^{७.६५.१९}आरावं परमं कृत्वा वध्यमानाः किरीटिना
निपेतुरनिशं भूमौ छिन्नपक्षा इवाद्रयः

^{७.६५.२०}अपरे दन्तवेष्टेषु कुम्भेषु च कटेषु च
शरैः समर्पिता नागाः क्रौञ्चवद्व्यनदन्मुहुः

^{७.६५.२१}गजस्कन्धगतानां च पुरुषाणां किरीटिना
आच्छिद्यन्तोत्तमाङ्गानि भल्लैः संनतपर्वभिः

^{७.६५.२२}सकुण्डलानां पततां शिरसां धरणीतले
पद्मानामिव संघातैः पार्थश्चक्रे निवेदनम्

^{७.६५.२३}यन्त्रबद्धा विकवचा व्रणार्ता रुधिरोक्षिताः
भ्रमत्सु युधि नागेषु मनुष्या विललम्बिरे

^{७.६५.२४}केचिदेकेन बाणेन सुमुक्तेन पतत्रिणा
द्वौ त्रयश्च विनिर्भिन्ना निपेतुर्धरणीतले

^{७.६५.२५}मौर्वीं धनुर्ध्वजं चैव युगानीषास्तथैव च
रथिनां कुट्टयामास भल्लैः संनतपर्वभिः

^{७.६५.२६}न संदधन्न चाप्यस्यन्न विमुञ्चन्न चोद्धरन्
मण्डलेनैव धनुषा नृत्यन्पार्थः स्म दृश्यते

^{७.६५.२७}अतिविद्धाश्च नाराचैर्वमन्तो रुधिरं मुखैः
मुहूर्तान्निपतन्त्यन्ये वारणा वसुधातले

^{७.६५.२८}उत्थितान्यगणेयानि कबन्धानि समन्ततः
अदृश्यन्त महाराज तस्मिन्परमसंकुले

^{७.६५.२९}सचापाः साङ्गुलित्राणाः सखड्गाः साङ्गदा रणे
अदृश्यन्त भुजाश्छिन्ना हेमाभरणभूषिताः

^{७.६५.३०}सूपस्करैरधिष्ठानैरीषादण्डकबन्धुरैः
चक्रैर्विमथितैरक्षै भग्नैश्च बहुधा युगैः

^{७.६५.३१}वर्मचापशरैश्चैव व्यवकीर्णैस्ततस्ततः
स्रग्भिराभरणैर्वस्त्रैः पतितैश्च महाध्वजैः

^{७.६५.३२}निहतैर्वारणैरश्वैः क्षत्रियैश्च निपातितैः
अदृश्यत मही तत्र दारुणप्रतिदर्शना

^{७.६५.३३}एवं दुःशासनबलं वध्यमानं किरीटिना
संप्राद्रवन्महाराज व्यथितं वै सनायकम्

^{७.६५.३४}ततो दुःशासनस्त्रस्तः सहानीकः शरार्दितः
द्रोणं त्रातारमाकाङ्क्षञ्शकटव्यूहमभ्यगात्