^{१२.३५२.१}ब्राह्मण उवाच

^{१२.३५२.२}आश्चर्यं नात्र संदेहः सुप्रीतोऽस्मि भुजंगम
अन्वर्थोपगतैर्वाक्यैः पन्थानं चास्मि दर्शितः

^{१२.३५२.३}स्वस्ति तेऽस्तु गमिष्यामि साधो भुजगसत्तम
स्मरणीयोऽस्मि भवता संप्रेषणनियोजनैः

^{१२.३५२.४}नाग उवाच

^{१२.३५२.५}अनुक्त्वा मद्गतं कार्यं क्वेदानीं प्रस्थितो भवान्
उच्यतां द्विज यत्कार्यं यदर्थं त्वमिहागतः

^{१२.३५२.६}उक्तानुक्ते कृते कार्ये मामामन्त्र्य द्विजर्षभ
मया प्रत्यभ्यनुज्ञातस्ततो यास्यसि ब्राह्मण

^{१२.३५२.७}न हि मां केवलं दृष्ट्वा त्यक्त्वा प्रणयवानिह
गन्तुमर्हसि विप्रर्षे वृक्षमूलगतो यथा

^{१२.३५२.८}त्वयि चाहं द्विजश्रेष्ठ भवान्मयि न संशयः
लोकोऽयं भवतः सर्वः का चिन्ता मयि तेऽनघ

^{१२.३५२.९}ब्राह्मण उवाच

^{१२.३५२.१०}एवमेतन्महाप्राज्ञ विज्ञातार्थ भुजंगम
नातिरिक्तास्त्वया देवाः सर्वथैव यथातथम्

^{१२.३५२.११}य एवाहं स एव त्वमेवमेतद्भुजंगम
अहं भवांश्च भूतानि सर्वे सर्वत्रगाः सदा

^{१२.३५२.१२}आसीत्तु मे भोगपते संशयः पुण्यसंचये
सोऽहमुञ्छव्रतं साधो चरिष्याम्यर्थदर्शनम्

^{१२.३५२.१३}एष मे निश्चयः साधो कृतः कारणवत्तरः
आमन्त्रयामि भद्रं ते कृतार्थोऽस्मि भुजंगम