^{५.१४०.१}संजय उवाच

^{५.१४०.२}कर्णस्य वचनं श्रुत्वा केशवः परवीरहा
उवाच प्रहसन्वाक्यं स्मितपूर्वमिदं तदा

^{५.१४०.३}अपि त्वां न तपेत्कर्ण राज्यलाभोपपादना
मया दत्तां हि पृथिवीं न प्रशासितुमिच्छसि

^{५.१४०.४}ध्रुवो जयः पाण्डवानामितीदं; न संशयः कश्चन विद्यतेऽत्र
जयध्वजो दृश्यते पाण्डवस्य; समुच्छ्रितो वानरराज उग्रः

^{५.१४०.५}दिव्या माया विहिता भौवनेन; समुच्छ्रिता इन्द्रकेतुप्रकाशा
दिव्यानि भूतानि भयावहानि; दृश्यन्ति चैवात्र भयानकानि

^{५.१४०.६}न सज्जते शैलवनस्पतिभ्य; ऊर्ध्वं तिर्यग्योजनमात्ररूपः
श्रीमान्ध्वजः कर्ण धनंजयस्य; समुच्छ्रितः पावकतुल्यरूपः

^{५.१४०.७}यदा द्रक्ष्यसि संग्रामे श्वेताश्वं कृष्णसारथिम्
ऐन्द्रमस्त्रं विकुर्वाणमुभे चैवाग्निमारुते

^{५.१४०.८}गाण्डीवस्य च निर्घोषं विस्फूर्जितमिवाशनेः
न तदा भविता त्रेता न कृतं द्वापरं न च

^{५.१४०.९}यदा द्रक्ष्यसि संग्रामे कुन्तीपुत्रं युधिष्ठिरम्
जपहोमसमायुक्तं स्वां रक्षन्तं महाचमूम्

^{५.१४०.१०}आदित्यमिव दुर्धर्षं तपन्तं शत्रुवाहिनीम्
न तदा भविता त्रेता न कृतं द्वापरं न च

^{५.१४०.११}यदा द्रक्ष्यसि संग्रामे भीमसेनं महाबलम्
दुःशासनस्य रुधिरं पीत्वा नृत्यन्तमाहवे

^{५.१४०.१२}प्रभिन्नमिव मातङ्गं प्रतिद्विरदघातिनम्
न तदा भविता त्रेता न कृतं द्वापरं न च

^{५.१४०.१३}यदा द्रक्ष्यसि संग्रामे माद्रीपुत्रौ महारथौ
वाहिनीं धार्तराष्ट्राणां क्षोभयन्तौ गजाविव

^{५.१४०.१४}विगाढे शस्त्रसंपाते परवीररथारुजौ
न तदा भविता त्रेता न कृतं द्वापरं न च

^{५.१४०.१५}यदा द्रक्ष्यसि संग्रामे द्रोणं शांतनवं कृपम्
सुयोधनं च राजानं सैन्धवं च जयद्रथम्

^{५.१४०.१६}युद्धायापततस्तूर्णं वारितान्सव्यसाचिना
न तदा भविता त्रेता न कृतं द्वापरं न च

^{५.१४०.१७}ब्रूयाः कर्ण इतो गत्वा द्रोणं शांतनवं कृपम्
सौम्योऽयं वर्तते मासः सुप्रापयवसेन्धनः

^{५.१४०.१८}पक्वौषधिवनस्फीतः फलवानल्पमक्षिकः
निष्पङ्को रसवत्तोयो नात्युष्णशिशिरः सुखः

^{५.१४०.१९}सप्तमाच्चापि दिवसादमावास्या भविष्यति
संग्रामं योजयेत्तत्र तां ह्याहुः शक्रदेवताम्

^{५.१४०.२०}तथा राज्ञो वदेः सर्वान्ये युद्धायाभ्युपागताः
यद्वो मनीषितं तद्वै सर्वं संपादयामि वः

^{५.१४०.२१}राजानो राजपुत्राश्च दुर्योधनवशानुगाः
प्राप्य शस्त्रेण निधनं प्राप्स्यन्ति गतिमुत्तमाम्