^{५.६४.१}वैशंपायन उवाच

^{५.६४.२}एवमुक्त्वा महाप्राज्ञो धृतराष्ट्रः सुयोधनम्
पुनरेव महाभागः संजयं पर्यपृच्छत

^{५.६४.३}ब्रूहि संजय यच्छेषं वासुदेवादनन्तरम्
यदर्जुन उवाच त्वां परं कौतूहलं हि मे

^{५.६४.४}संजय उवाच

^{५.६४.५}वासुदेववचः श्रुत्वा कुन्तीपुत्रो धनंजयः
उवाच काले दुर्धर्षो वासुदेवस्य शृण्वतः

^{५.६४.६}पितामहं शांतनवं धृतराष्ट्रं च संजय
द्रोणं कृपं च कर्णं च महाराजं च बाह्लिकम्

^{५.६४.७}द्रौणिं च सोमदत्तं च शकुनिं चापि सौबलम्
दुःशासनं शलं चैव पुरुमित्रं विविंशतिम्

^{५.६४.८}विकर्णं चित्रसेनं च जयत्सेनं च पार्थिवम्
विन्दानुविन्दावावन्त्यौ दुर्मुखं चापि कौरवम्

^{५.६४.९}सैन्धवं दुःसहं चैव भूरिश्रवसमेव च
भगदत्तं च राजानं जलसंधं च पार्थिवम्

^{५.६४.१०}ये चाप्यन्ये पार्थिवास्तत्र योद्धुं; समागताः कौरवाणां प्रियार्थम्
मुमूर्षवः पाण्डवाग्नौ प्रदीप्ते; समानीता धार्तराष्ट्रेण सूत

^{५.६४.११}यथान्यायं कौशलं वन्दनं च; समागता मद्वचनेन वाच्याः
इदं ब्रूयाः संजय राजमध्ये; सुयोधनं पापकृतां प्रधानम्

^{५.६४.१२}अमर्षणं दुर्मतिं राजपुत्रं; पापात्मानं धार्तराष्ट्रं सुलुब्धम्
सर्वं ममैतद्वचनं समग्रं; सहामात्यं संजय श्रावयेथाः

^{५.६४.१३}एवं प्रतिष्ठाप्य धनंजयो मां; ततोऽर्थवद्धर्मवच्चापि वाक्यम्
प्रोवाचेदं वासुदेवं समीक्ष्य; पार्थो धीमाँल्लोहितान्तायताक्षः

^{५.६४.१४}यथा श्रुतं ते वदतो महात्मनो; मधुप्रवीरस्य वचः समाहितम्
तथैव वाच्यं भवता हि मद्वचः; समागतेषु क्षितिपेषु सर्वशः

^{५.६४.१५}शराग्निधूमे रथनेमिनादिते; धनुःस्रुवेणास्त्रबलापहारिणा
यथा न होमः क्रियते महामृधे; तथा समेत्य प्रयतध्वमादृताः

^{५.६४.१६}न चेत्प्रयच्छध्वममित्रघातिनो; युधिष्ठिरस्यांशमभीप्सितं स्वकम्
नयामि वः स्वाश्वपदातिकुञ्जरा;न्दिशं पितॄणामशिवां शितैः शरैः

^{५.६४.१७}ततोऽहमामन्त्र्य चतुर्भुजं हरिं; धनंजयं चैव नमस्य सत्वरः
जवेन संप्राप्त इहामरद्युते; तवान्तिकं प्रापयितुं वचो महत्